१५ पुष, बाँके । नेपालगञ्जमा पार्श्वसंगीत सहित कविता प्रस्तुति हुने भएको छ । कवि बीपी अस्तुका एक दर्जनबढी कविताहरू प्रस्तुत गरिने उक्त कार्यक्रम पुस १९ गते शनिबार अन्तरालले आयोजना गर्दैछ ।
प्रभावकारी र एकाग्रतापूर्ण वातावरणमा कविता प्रस्तुतिले कार्यक्रमलाई स्मरणीय बनाउने गरी तयारी भैरहेको अन्तरालका प्रमुख कार्यकारी जयनारायण शाहले जानकारी दिए ।
Advertisement
नेपालगञ्ज सुर्खेत रोडस्थित वेष्टर्न मलमा रहेको अन्तराल हलमा हुने उक्त कार्यक्रममा सशुल्क सहभागिताको व्यवस्था गर्न लागिएको पनि शाहले जानकारी दिए । अन्तराल डेढ दशक बढी समय देखि सञ्चार, कला, साहित्य, गीतसंगीत, खेलकुद, ईभेन्ट म्यानेजमेन्ट र पर्यावरणका क्षेत्रमा काम गर्दै आएको संस्था हो।
कवि अस्तु साहित्य र पत्रकारिताका सशक्त कलम चलाउँछन् । ’मैले कविता लेख्न सिकेको शहरमै पहिलोपटक एकल कविता प्रस्तुति हुन लागेकोमा म उत्साहित छुँ’ कवि बीपीले भने, ‘सँगीतको पार्श्वले कविता श्रवणलाई थप प्रभावकारी बनाउनेछ भन्ने विश्वास छ ।’
Advertisement
संगीतमा गायक महेन्द्र सेडाई सहितका संगीतकर्मीहरुले साथ दिनेछन्। हाल कार्यक्रमका लागि रिहर्शल भईरहेको छ ।
अन्तराल शृङ्खला अब हरेक महिना निरन्तरता दिने ढंगले तयारी भईरहेको आयोजकले जनाएको छ। ‘कविता र संगीतको बेजोड प्रस्तुति दर्शक तथा स्रोताहरुले मन पराउने हाम्रो विश्वास छ,’ अन्तरालका प्रमुख कार्यकारी शाह भन्छन्, ’अन्तरालको यो मंचमा आगामी महिनाहरुमा कला, साहित्य, गीतसंगीत र खेलकुदका विशिष्ट व्यक्तित्वलाई प्रस्तुत गरिनेछ ।’
Advertisement
कार्यक्रम निर्धारित समयमा सुरु हुने र दर्शकहरु पलेंटीमा बस्ने प्रवन्ध मिलाईएको आयोजकले जनाएको छ। कार्यक्रम अघिको आधा घण्टा भलाकुशारी र जलपानका लागि छुट्याईएको छ। कार्यक्रम शुरु हुनु १० मिनेट अघि हलको ढोका खुल्ने र एक घण्टा कविता प्रस्तुतिको कार्यक्रम रहनेछ ।
पाँच सय रुपैयाँको टिकट सुरुमा बुकिङ गर्नेहरूलाई ५० प्रतिशत छुटको व्यवस्था पनि मिलाइएको आयोजकले जनाएको छ । टिकट अन्तरालको कार्यालय र विभिन्न क्याफेहरुमा उपलब्ध छ ।
Advertisement
टिप्पणीहरू