८ फाल्गुन, बाँके । नेपालगञ्जमा आजबाट हुन लागेको प्रथम नेपालगञ्ज आदर्श तेक्वान्दो दोजाङ्ग प्रतियोगिता २०८२ को तयारी पूरा भएको छ ।
यही फागुनको ८ र ९ गते नेपालगञ्ज रंगशालामा हुन लागेको प्रतियोगितामा सहभागि हुनेहरुको नामावली, अथितिलगायतको सबै तयारी पुरा भएको आयोजक आदर्श तेक्वान्दो दोजाङ्गले जनाएको हो ।
Advertisement
विगत लामो समयदेखि यस औद्योगिक नगरी नेपालगन्जमा हालसम्म कुनै प्रकारको तेक्वान्दो प्रतियोगिता सञ्चालन नभएकोले प्रथम पटक तेक्वान्दो प्रतियोगिता आयोजना गरिएको आदर्श तेक्वान्दो दोजाङ्गका चन्द्र प्रकाश श्रेष्ठले जानकारी दिए ।
उनका अनुसार प्रतियोगितामा सहभागि हुने दोजाङ्गको नामावली आइसकेको, प्रमुख अथितिको टुंगो लागिसकेको छ ।
Advertisement
प्रतियोगितालाई नेपाल तेक्वान्दो संघका केन्द्रीय सदस्य श्रीमान थापा मगरले उद्घाटन गर्ने तयारी भएको राष्ट्रिय खेलकुद परिषदका कर्मचारी एवं प्रशिक्षकसमेत रहनुभएका श्रेष्ठले बताए ।
लुम्बिनी प्रदेश अन्तर्गत नेपालगञ्ज उपमहानगरपालिकामा विगत २०४५ सालदेखि निरन्तर तेक्वान्दो खेलको प्रशिक्षण भईरहेको छ । यसरी विभिन्न समयमा तेक्वान्दो खेलाडीहरुले बाँके जिल्ला र नेपालगञ्जको नाम राष्ट्रिय तथा अन्तर्राष्ट्रिय स्तरमासमेत राख्न सफल भएको श्रेष्ठले बताए ।
Advertisement
प्रत्येक युवा तथा नागरिक अनुशासित, सभ्य, राष्ट्रप्रेमी र स्वस्थ रहे मात्र आफ्नो ठाउँ तथा जिल्ला र देशको परिवर्तनमा सहभागी हुन सक्ने भएकाले यस्ता प्रतियोगितालाई निरन्तर गर्न सकिए राम्रो हुने श्रेष्ठले बताए ।
‘स्वास्थ्यका लागि खेलकुद, राष्ट्रका लागि खेलकुद भन्ने गरिन्छ,’ श्रेष्ठले भन्नुभयो, ‘यसको मुलमन्त्र पनि सबै संस्थाले पालना गर्नुपर्छ ।’ आदर्शको लक्ष्य पनि अब यस्तो प्रतियोगितालाई नियमित गर्नु रहेको श्रेष्ठले बताए ।
Advertisement
नेपाल तेक्वान्दो संघ जिल्ला कार्यसमिति बाँकेका अध्यक्ष प्रकाश लामिछानेको अध्यक्षतामा हुने प्रतियोगिता संचालनका लागि आयोजकले निजी क्षेत्रसंग सहकार्य गरेको छ । प्रतियोगितामा २० वटा दोजाङ्गबाट करिब तीन सय जना खेलाडी सहभागी हुने भएका छन् ।
प्रतियोगितामा विजेता, उपविजेता र तृतीय हुनेलाई मेडल प्रमाणपत्र र नगद प्रदान गरिने जनाइएको छ । दुबै दिन बिहान ७ बजेदेखि सुरु हुने प्रतियोगितामा उपस्थितिका लागि सबै खेलप्रेमीलाई आयोजकले आग्रह गरेको छ ।
टिप्पणीहरू