अज्ञात समुहको खुकुरी प्रहारबाट रामेछापको बेतालिमा एक वृद्धको ज्यान गयो

पुष्कर खड्का
१४ चैत, रामेछाप । रामेछापको गोकुलगंगा गाउँपालिकामा खुकुरी प्रहारबाट एक वृद्धको मृत्यु भएको छ । खुकुरी प्रहारबाट मृत्यु हुनेमा गोकुलगंगा गाउँपालिका वडा नम्बर ४ बेतालीस्थित लिसेखानीका अन्दाजी ८२ वर्षीय वृद्ध शमशेर बहादुर थापामगरको मृत्यु भएको हो ।

अज्ञात समुहले सोमबार साँझ करिब साढे ७ बजेको समयमा आफ्नै घरमा बसिरहेको अवस्थामा थापामगरमाथि खुकुरी प्रहार गरेका थिए । खुकुरी प्रहारबाट घाइते भएका उनलाई उपचारका लागि मन्थली लैजाने क्रममा बाटोमै मृत्यु भएको गोकुलगंगा गाउँपालिका वडा नम्बर ४ का वडाध्यक्ष रामचन्द्र बस्नेतले जानकारी दिनुभयो । ति वृद्धाको श्रीमती बिरामी भएर काठमाठौ गएकी थिइन । घरमा छोरीहरु भएपनि बाहिर गएको अवस्थामा सो घटना घटेको स्थानीयले बताएका छन् ।

Advertisement

स्थानीयले दिएको जानकारी अनुसार खुकुरी प्रहारबाट थापामगरको टाउकोमा गम्भीर चोट लागेको थियो भने एउटा हातको अम्ला काटिएको थियो । कसले र किन खुकुरी प्रहार गरेको भन्ने विषयमा केहि नखुलेको र घटनाको विषयमा थप अनुसन्धान भइरहेको जिल्ला प्रहरी कार्यालय रामेछापले जानकारी दिएको छ ।

यसअघि पनि बेताली भिमसेनथान स्थित सिरानघरकी अन्दाजी ७६ वर्षीया वृद्धा पदमकुमारी खड्काको आधा शरीर जलेको अवस्थामा शंकास्पद शव फेला परेको थियो ।

Advertisement